النجمة ايناس عز الدين تواصل كشف كواليس من حياتها الخاصة وأسرار لأول مرة

كشفت المطربة إيناس عز الدين لجمهورها عن محطات قاسية في حياتها، حيث روت تفاصيل معاناتها في طفولتها والحرمان الذي عانت منه، مقابل الرحمة والحب الذي قررت منحه لمن حولها. ورغم الألم الذي واجهته، لم تستسلم للقسوة، بل اختارت أن تكون مصدر دعم وعطاء لكل من يحتاجه، سواء من البشر أو حتى الحيوانات الضالة.

وكتبت ايناس عبر حسابها بموقع «فيس بوك»: «تخيلوا معايا كده للحظة، الطفلة الصغيرة اللي إتحرمت من الحنان لما تكبر تملا الدنيا حنان لدرجة إن بيتها يتحول لملجأ حيوانات ضالة وأصحاب حالات خاصة وتتكفل بيهم من قوت يومها من غير ما تاخد مليم من حد لو هتجوع تأكلهم وتعالجهم، الطفلة اللي كانت بتدور على حضن الأب والأم وما تلاقيهوش وتلاقي قصاده ضرب وعنف وسب وإيذاء جسدي ونفسي وإبتزاز عاطفي ومادي ولما تشتكي إن حد أذاها بدل ما يجيلها حقها تتعاقب هي بأسوأ طرق العقاب اللي ممكن العقل ما يتصورهاش تحولت لإنسانة ماشية توزع أحضان وحب وكلام حلو على كل الناس اللي تعرفه واللي ما تعرفوش مش بس كده دي بقت فنانة بتقف على مسرح والضحكة على وشها من الودن للودن وتسعد الناس وتتنطط وترقص كأن قلبها ما داقش يوم طعم الوجع».

أضافت: «الطفلة اللي إتسرق منها طفولتها وبرائتها وشبابها وإبتسامتها وكل ذكرياتها الجميلة وإتحط مكانهم ذكريات القلب مش متحملها لدرجة إن الست اللي ربتها كانت بتقوم بمليون دوروبتتشقلب وتعمل المستحيل وحاطة في بؤ البنت معلقة دهب علشان تعوضها كل المشاعر اللي فقدتها وبزيادة كمان أكتر من أي مخلوق بس غصب عنها فيه مشاعر بنستناها من الأهل نفسهم ولو ما جاتش منهم بنحسها ناقصة لو اللي قدامنا قادوا لينا الكون كله شمع بس الطفلة دي برغم الإيذاء ده كله لما كبرت مش بتأذي حد بالعكس دي قافلة حياتها على نفسها وعلى بيتها مالهاش اصحاب مالهاش حد وبرغم معرفتها بكل الناس وحبها ليهم عمرها ما طلبت مساعدة من حد في شغلها أو في أي حاجة لانها خايفة تخسرهم لان قلبها ما اتملاش بالكره برغم انها داقته عمرها كله».

تابعت: «ازاي حد ممكن يقول على الطفلة دي بعد ما تكبر انها غلط وانها مش بطلة انها لسه عايشة وأن الدنيا ما لوثتهاش بدمها اللي دبحتها بيه وان كانت الدنيا كل ما تدبحها كانت تطهر نفسها بالحب والرحمة وتتمادى فيهم اكتر، ... انا راسي مرفوعة بنفسي جدًا اني ما تحولتش لنسخة من جلادي».